MP-in Mizoram tan Thlawhna a dil belh Lok Sabha MP C Lalrosanga chuan June 28, 2019 khan Parliament House office-ah Union Civil Aviation minister Hardeep S Puri a hmu a; Lengpui Airport-ah thlawhtheihna service a awm belh theih nan theihtawp chhuahpui turin a ngen. C Lalrosanga hian Aviation Minister chu Lengpui Airport-ah chawlhkar khata thlawhtheihna 10 chauh thlawkin mipui mamawh a phuhrûk zawh lo nasat thu leh, hmun dang aiin thlawhna chuan man nasa taka a to bik thu a hrilh a; Aizawl-Guwahati leh Aizawl-Delhi inkara Air India emaw, private airline emaw thlawhtir dan ngaihtuahpui turin a ngen a ni. Regional Connectivity Scheme hnuaia Lengpui Airport huamtir ve ngei tura Mizoram Lok Sabha MP-in a ngenna chu Hardeep S Puri chuan, UDAN scheme hnuaiah airline-te'n khaw tê 39 an thlawhpawh tawh thu leh, Aizawl pawh tiamin khaw dang 100 velah tlawhtir tura hmalak tum a nih thu a sawi. Civil Avation Minister hian, thlawhna chuan man sang nasa tihniam tura airline hote nena a khát tâwka an indawr ṭhin thu, June 27, 2019 khan Lok Sabha session-ah a lo sawi tawh a ni.